São Sebastião do Caí, Rio Grande do Sul, Brazil

terça-feira, 23 de dezembro de 2008

HIN UN HEA / WAINACHTS NACHT

WAIHNACHTS NACHT

Fill iore sin chon fagan fon de tsaite wo ich ene klene guri wód un hat noch an de Pelts Nickell geklóbt.
Es is awa en fiilung wo ma ni fagisst. Mein Gott, wi wód das chehn móinds, am Wainachtstóh uf chtaie un sihen das es Kristkinntche etwas uns gebrun hot. Wenn es ach nohre ene naie tsaich chtoff wód fa en nai hemmtche mache.
Dan, in de negst woch is chon di mamai mit uns bai di nêderin gang un si hot unsa moos abgeholl fa en nái un fain hemmt se mache. Mea sin dan ausnams prosich gieb wall ma en nái Wainachts hemmt harre.
Haitsestóhe tun di kenna so was ni me fawehre. Gewiss, es is doch so laicht in es gescheftshaus gehn un en nai hemmt kóofe, bíllich un in de form un in dem chtoff wo gród ma sich foa chtelle kan.
Dann, kimmt de Wainachtstóch, un di parente all bringe hemmta fa di kenna. Dan giebt de chrank foll un ma wées net wasfa hemmt ma de eascht em kinnt ón tut.
Awa, es wóore óh di tsaite wo ma net so fill an di pêckcha gedenkt hot, un meh an unsa gangung des lewe gedenk hot. Un fillmohls wóore ma net so órich gut mit de nôchbere, oda mit de parente. Dan, in de woche foa dem Wainachtstóh, sin di eltre bai de parent gerréest un hon sich nommo óngefang se gewe.
Di nôchbere sin óch besuucht gieb mit en totsent óia una dem érwell, oda mit en grohs un apetitlich waissmehls brot. Es wód ima so passiat: De êascht hot unsa muta uns geschickt es geschenk dort hin drón. Dan, wenn ma hin komm weat, sollt ma sóon:
- Nochbarin, unsa muta hot di óia geschikt. Sollt se awa glaich benutste wall di sin chon en woch allt. Di mamai hot óch gefrod ob si hait foa nacht kennt ene thêe bai aich drinke komme.
- Ia, gewiss! - Antwort di nochbars fró. - Só fa dain muti si kennt nohre komme, ich richte mich in de órwed fa das.
So is es dan passiat. Di muti is bai di nochbars fró móie gang un di froindschaft fon dem tóoch on forran wód nommo grohs un chtarrek. Do hat nohre ene bissie gute wille gefehlt.
Wolle mea diese Wainacht gut no unsa bekante guke, un denke was mea tun kenne fa alles um uns romm bessa lóofe kennt. Es wet des grehst geschenk sin fa es ganse naies ioa. Unsa hets will sich laicht fiile un so will alles bessa gehn in de geschefta un in unsa gesunthéd. Probia es!

Nenhum comentário:

Postar um comentário